“كامل الوزير”: “هستقيل من منصبي لو كنت مقصر”
رد كامل الوزير، وزير النقل والمواصلات، عن بعض المطالب بإقالته أو استقالته من منصبه بعد حادث تصادم قطاري سوهاج، قائلا: “أنا كطبعي كامل الوزير كشخص، مهندس مقاتل من يوم ما اتخرجت من الكلية الفنية العسكرية سنة 1980، وأنا أقاتل في الجبال وبالمؤسسة العريقة بالقوات المسلحة، وأنا جندي مقاتل متعودتش أهرب، حتى قبل ما أبقى ظابط خريج الكلية الفنية العسكرية”.
وأضاف “الوزير”، خلال اتصال هاتفي ببرنامج “الحكاية”، المذاع على شاشة قناة “MBC مصر”، ويقدمه الإعلامي عمرو أديب، “أنا من قرية كفرالوزير مركز المنصورة فلاح ابن فلاح متعود اشتغل في غيطي وأتحدى، ومتعودتش أهرب ولا يمكن أهرب، حد بيقولي قدم استقالتك، طب لو أنا مقدم استقالتي وكل وزير يحصل عنده حادثة يقدم استقالته، طب ما أنا من باب أولى أقيل رئيس هيئة السكة الحديد لكن مبقاش بقهم كده”.
وتابع: “هو لما يحصل حادثة، هو أنا أو رئيس هيئة السكة الحديد هنركب القطر؟، لأ، أحنا لينا دور ومهمة، وأنا بعمل كل اللي عندي وكل طاقتي وبستنفذ كل طاقتي وبتعب لكن سعيد، وتحت أمر بلدي وشعبي ورئيس الجمهورية اللي وثق فيا وعيني وزيرا للنقل عشان مخذلهوش وهفضل أقاتل وأقاوم ومع وزمايلي في السكة الحديد وأنفذ خططي وأطور فيها، ولو الناس شايفة إني متكاسل ومقصر ومش بشتغل خلاص هطلع أقول أنا مستقيل وشوفوا حد أفضل مني وهساعده، لكن الحل مش إني أهرب، لو أنا هربت أبقى خاين لبلدي”.
وأكد وزير النقل أنه حصل على كل الاعتمادات المالية التي طالب بها لتطوير مرفق السكك الحديدية، وحصلت على مدار العشر سنوات الماضية 1.5 تريليون جنيه، وذلك للارتقاء بخدمات وزارة النقل، “أنا شايف أقدر أكمل إن شاء الله وأقود المجموعة اللي معايا في كل قطاعات النقل، وهكمل، ومش ههرب، لكن لو الناس بتقولي متقعدش عندنا حد أفضل منك أنا موافق لكن لن أهرب او أتكاسل، أنا تحت أمر بلدي وكل المصريين”.
وأوضح أنه سيذهب لمجلس النواب وسيعرض تفاصيل حادث تصادم قطاري سوهاج بعد الانتهاء من التحقيقات، “لو أنا مخطئ وأنا هناك هقولهم شكرا شوفوا حد غيري، وأقدم لرئيسي اللي اختارني ووثق فيا ويشوف أي حد مكاني، ولكن لو أحنا هنشتغل بالحتة، يعني لو حادثة حصلت في وزارة النقل يبقى وزير النقل يمشي، دي مش دول، الدول لا تدار بالمنظر ده”.
